HONG KONG
Email: admin@npsl.com.hk
-min.png)
過完年拎埋Bonus，搵到份好工，又係時候遞辭職信啦！好多人以為就咁遞信啫，都冇咩需要注意嘅地方，然而其實有好多禮節都要留意翻。做足呢啲禮節，除咗尊重自己、尊重公司之外，亦可以避免雙方鬧得唔愉快嘅情況出現，話哂將來難免喺市場上再相遇翻 ~ 所以以下呢幾個問題，對於即將辭職嘅你，就需要多加留意！
辭職信應該先遞俾直屬上司。直屬上司一直以嚟都係帶住你、指導你嘅嗰一位，如果要辭職嘅話，首先要通知咗你上司先，以示尊重。其次，都需要俾上司預先了解翻你離開嘅原因，方便向上面交代。假如你將辭職信先遞俾HR，上司就會喺HR口中得知你辭職嘅消息，除咗顏面不保之外，心入面難免會有條刺，而HR之所以有必要知道你辭職呢個消息，好大原因係基於職責同有程序需要履行嘅緣故，所以應該先遞俾直屬上司，後再通知HR。另外，辭職信最好親身交，唔好以whatsapp形式去遞，假如短期內見唔到上司，可以email俾上司。
由於辭職信係正式信件，內容應盡量簡潔同精準，可以先提及辭去嘅職位名稱、公司名稱同最後上班日期，再請公司提供離職證明或者推薦信。喺文末，記得向公司同埋上司表達你對佢哋過往提攜嘅感恩之情，而下款再填寫自己全名、署名同埋當日通知日期。
最好嘅時段係方便上司嘅時段，假如你知道上司喺幾分鐘後要開會，咁就唔好喺呢段時間遞啦！亦可以係收工前大約一至兩小時遞信，一來可以俾上司充足時間消化、同你傾幾句，二來可以減少當天遞完信之後尷尬嘅時間！
開頭，可以以感謝嘅方式切入話題，再明確而禮貌地道明想離職嘅意向同原因，並表示會好好交接自己手頭上嘅工作。假如你有一啲對公司嘅不滿或者建議，除非上司表明需要你嘅建議，如果唔係都唔需要係呢啲情況下提及。
假如你去意已決，就需要清楚表明俾上司知道。如果有可商量嘅餘地，可以嘗試委婉地向上司提出你嘅期望，例如你離開嘅原因係公司一直冇提供升職嘅機會俾你，可以間接向上司表示你希望喺出面市場搵到一個有晉升機會嘅職位，上司就會明白你嘅意思，會再作出恰當嘅回應。如果上司問你係咪對公司有什麼不滿，你可以表示離開純粹基於私人原因，希望在外面世界嘗試更多機會，增加自己人生閱歷。
可以低調通知幾位比較要好嘅同事，但盡量唔好可向公司上上下下每一位同事透露，待上司或者HR代為宣佈，畢竟辭職一事亦算係公司內部事宜。
視乎個人意願同喺公司做咗幾耐。假如喺公司做咗兩至三個月，仲未過試用期嘅話，大可不必派散水餅。如果做咗至少半年以上，同同事之間建立咗深厚嘅感情，可以派散水餅以感謝大家一直以嚟嘅照顧同提攜。而散水餅種類非常多，豐儉由人，用心揀選過就可以了。假如有啲同事經常外出工作，可以向佢咃派一啲獨立包裝嘅甜點，再附上簡單幾句感謝字句嘅字條。
