HONG KONG
Email: admin@npsl.com.hk
.png)
有啲人以為第一日返新工，對公司同埋自己嚟緊嘅職責都未夠了解，兩手揈揈，帶個人返工就得！事實上第一印象好重要，無論心理定係行為，都需要係返工之前準備好。假如準備充足，第一印象建立得好嘅話，絕對可以喺新公司有個好開始 ~ 但係要預備啲咩，嚟緊返新工嘅你有冇諗過？
返工嘅第一日當然唔可以遲到啦，呢個係基本~ 但係早到更加俾到公司一個好印象，令大家覺得你對工作充滿熱誠、態度認真之餘，又可以俾到人事部充裕嘅時間同你處理簽約同埋講解公司規矩。
即使HR喺俾offer嗰陣同你講佢哋公司衣著文化好casual都好，第一日返工都唔好著得太過隨性，著翻Business Casual或者formal 少少，到時返到公司再留意吓同事嘅衣著，第二日再作調整。女士盡量唔好著短裙同化濃妝，亦唔好噴過多香水，而男士裇衫、西褲要燙好，避免太過皺摺，俾人感覺你對自身冇要求。
就算HR冇同你喺電話講定，第一日返工都記得帶齊幾樣嘢：身分證副本、學歷證明、銀行戶口證明、上一間公司嘅工作證明或者推薦信，方便HR當日幫你處理入職手續。另外，如果HR之前俾咗一啲表格你，記得返工之前填好哂啲資料，帶齊啲表格！
第一日返工，難免需要吸收大量資訊，而呢個時候HR可能未預備得切你需要嘅文具用品，自己預先準備好紙筆，方便make note，亦俾到同事一個好印象！往後嘅日子，自己再根據公司提供咗嘅文具，再帶備其他個人物品，例如文件夾、杯子、披肩等等，放多啲自己物品，可以令自己喺陌生環境更安心。
視乎翻公司文化，但通常你第一日返工，你嘅直屬上司都會安排一餐welcome lunch，等你同同事之間可以有個互相認識嘅機會，協助你盡早適應團隊文化，盡快融入大家嘅圈子，所以第一日返工，記得唔好帶飯或者約朋友食lunch啦！
第一日返工未必有咁多嘢做，可能會有好多空閒時間，呢個時候要多加注意自己嘅身體語言同坐姿，避免眼神太過遊離、精神放空、坐姿過於傾側或者玩手指等等，令人覺得你工作態度唔夠認真，處於心不在焉嘅狀態。
當上司介紹同事俾你認識嘅時候，盡量記住同事嘅名字同埋職位。假如有需要搵相關同事，可以避免重複問同事名字嘅尷尬時刻，亦可以拉近同同事之間嘅距離。另外，可以多啲認識同你差唔多時期入職或者年齡相近嘅同事，主動同佢哋聯絡，可以有助你更快融入公司圈子。
遇到唔明嘅地方，唔好怕麻煩同事，主動啲問，畢竟你係新同事，遇到困難好正常。主動請教同事，除咗可以避免不必要嘅錯誤、有助日後工作時更加得心應手之外，仲可以提升形象，俾人感覺你工作認真。假如完成手頭上嘅工作，亦可以主動問同事仲有冇咩需要幫忙或者有咩地方需要改善！
